香港新浪網 MySinaBlog
« 上一篇 | 下一篇 »
Gunner | 15th Oct 2009, 16:46 PM | 時事發蹹風 | (757 Reads)
曾蔭權最令人討厭之處,除了動不動便「黑面」外,還有「懶醒」以及「混淆視聽」,當全香港人也是傻仔。早上那個電台聯播節目,已經是毫不集中精神地「聽啲唔聽啲」,但他的回應,卻依然令人無名火起幾千丈。

當醫生的嚴小姐準備與律師男友拉埋大窗,想用真金白銀買個容身之所,卻因樓價望而生畏。可愛的特首卻說,不要被數萬元一呎的豪宅嚇窒。

其實我沒有聽清楚嚴小姐說話的完整內容,但我想絕對不可能大庭廣眾告訴別人,「我唔夠錢買天璽/凱旋門頂樓/富甲天下/名鑄呀,好心你叫誠哥/郭氏兄弟/彤叔俾個discount」啩? 嚴小姐要提出的討論點,就是別以為做中產好爽,你個煲呔卻叫港人不要望著豪宅的天價做人,喂,難道現在有300萬港人想成為「天匯」的業主嗎? 曾蔭權,你說話有否經大腦??!!

然後,無端端又爆出甚麼「4000蚊一呎的樓,仲有好多」,嘿,真的不說不知,原來香港樓價,平到你唔信!! 4000蚊就有一層樓......吓,不是一層咩? 一呎!! 唔係卦!! 因為我深信,只有「4000蚊一層」,才可以用如此輕鬆的語氣回應,原來我的耳朵有問題,那個不是「層」,而是「呎」字!! 煲呔,你這句話與董伯伯當年,問那位市民「你有無月餅食」一樣,果然對民間情況「感同身受」(嗱,唔好再講「身同感受」啦)。4000蚊一個500呎單位,等於多少錢呢? 還是其實在你心目中,一般議民住間百幾呎無獨立浴廁的板間房已很夠,所以認為「4000蚊一呎」的樓,抵過去街市買芥蘭??!!

跟住,又叫人要有事業基礎才好置業,再拿自己做例子,「當時咪一直租屋囉,等呀等,等到...(好心急想知你等了多久)...30歲左右」,30歲左右就有得買樓!!! 若是這樣你也覺得自己「唔叻仔」,那麼現正寫這篇垃圾文章那位仁兄,豈非要投河自盡!? 香港有多少人可以「30歲左右」便做業主??

不談樓價,談政改嘞,聽眾揶諭煲呔的「玩舖勁」根本一點也不「勁」,又指若果普選特首,就不會搞到現時一鑊粥。耐心的政治家特首跟著循循善誘地,向普羅市民教授《政治學初階》,解釋「普選不能解決乜乜物物」架,只欠未有把「你睇下奧巴馬個傻仔而家」衝口而出。

大佬(曾係忍不住要叫聲「大佬」),從來有哪位仁兄說過,有普選就「一天都光晒」? 那位男聽眾的重點,根本就是「唔滿意的話,至少幾年後我可以踢你走」,你個懵佬就公然在大氣電波混淆視聽,侃侃而談甚麼最最最民主國家也無法倖免於難,喂,不如你下次講阿富汗總統選舉,點票點足兩個月也懸疑未決,仲要幾乎個個票站也有假選票,好不好? 台灣人捱了陳水扁八年,人人叫苦連天,但起碼知道「八年」就是極限,至少夠鐘時有個新希望。但我們哪時才到達極限? 可能連你返去見上帝那時都仲未得!!

對著一個如此乞人憎到無朋友的一市之首,有乜辦法可以唔經常要換新電視?! (因為劑劑都想打爆個LCD TV)


[1]

一間公司內誰最無賴?不是老闆,而是一個將走之人。特首亦然。

灰先生
[引用] | 作者 灰先生 | 15th Oct 2009 17:25 PM | [舉報垃圾留言]

[2]

新一輩若人工普通,想在香港區買樓根本不用去想。要買唯有去新界了。

UncleRay
[引用] | 作者 UncleRay | 15th Oct 2009 19:30 PM | [舉報垃圾留言]

[3]

特首講「玩舖勁」,佢完全keeps his promise

全香港人被佢玩得唔夠勁咩?


[引用] | 作者 黑人 | 16th Oct 2009 00:55 AM | [舉報垃圾留言]

[4]

當奴真係唔屌唔鬆化


[引用] | 作者 Genius | 16th Oct 2009 10:39 AM | [舉報垃圾留言]

[5]

其實會否係當奴扮蠢另有圖謀呢?
因為當老董唔識做官,當奴好歹都做過肥彭旗下,點都學到D政治智慧掛..點會做幾年就可以講D蠢o野拍得住老董?
可能根本原因係中央到依家都唔信當奴..畢竟當奴係"港英餘孽"...
當然..如果佢講到令幾十萬人出o來用腳投票的話...中央肯信佢都唔再有用..

CC徐
[引用] | 作者 CC徐 | 17th Oct 2009 00:20 AM | [舉報垃圾留言]

[6]

年年袋340萬,鬼知道咩係人間煙火!


[引用] | 作者 krizcpec | 17th Oct 2009 14:39 PM | [舉報垃圾留言]

[7]

嗱、嗱、嗱!奉勸你呢啲年過三十都未有本事買4000幾蚊一呎廉價樓的仁兄,千祈咪咁衝動打爆個LCDTV呀,因住俾老婆"炳",要成幾千蚊先買得番0架,咪以為老曾會賠俾你,佢老人家淨係話俾一百蚊咁大把你買兩隻”親家牌”慳電膽咋!


[引用] | 作者 路人丙 | 18th Oct 2009 08:32 AM | [舉報垃圾留言]

[8]

唔好意思...樓價立場要唱反調了~
幾年前我的想法跟其他年青人一樣,覺得自己買唔起樓,後來入了這個遊戲,發現另有一番天地。

Dozy
[引用] | 作者 Dozy | 19th Oct 2009 02:05 AM | [舉報垃圾留言]

[9]

人間煙火係咪就係﹐有錢去冰島﹑有錢去英國﹑有錢去意大利﹑有錢去克羅地亞﹑有錢去捷克﹑有錢去瑞士﹐但係就無錢比首期呀﹖
我淨係舉個例﹐就係黃大仙豪苑﹐515尺賣168萬﹐尺價3千幾﹐首期都係六猜幾搞得掂。去少幾次旅行﹐都夠比首期...
黃大仙算市區啦卦﹖
唔信自己上中原網查...
中產無錢上車﹐超~~

文少
[引用] | 作者 文少 | 25th Oct 2009 05:11 AM | [舉報垃圾留言]

[10] Re: 文少
文少 :
人間煙火係咪就係﹐有錢去冰島﹑有錢去英國﹑有錢去意大利﹑有錢去克羅地亞﹑有錢去捷克﹑有錢去瑞士﹐但係就無錢比首期呀﹖我淨係舉個例﹐就係黃大仙豪苑﹐515尺賣168萬﹐尺價3千幾﹐首期都係六猜幾搞得掂。去少幾次旅行﹐都夠比首期...黃大仙算市區啦卦﹖唔信自己上中原網查...中產無錢上車﹐超~~


你講得啱呀,如果上咗車,個個月要供樓,哼!咪話冰島;連離島都冇錢去!


[引用] | 作者 路人丙 | 26th Oct 2009 19:06 PM | [舉報垃圾留言]


丙,你都幾得閒,人地又唔係話緊我,又唔係冷嘲熱諷,又唔係指桑罵槐,你竟有氣去回應埋呢啲都唔知應該稱之為咩o既回應,佩服呀! 仲有呀,有人話你(路人丙)其實係我(gunner)自說自話「扮分身」唱雙簧架增加留言數目架咋,好心你(定係「我」呢)有時間就學下打麻雀,防止老人痴呆啦!

[引用版主回覆] | 作者 Gunner | 1st Nov 2009 00:17 AM

[11] Re: Gunner
Gunner :

丙,你都幾得閒,人地又唔係話緊我,又唔係冷嘲熱諷,又唔係指桑罵槐,你竟有氣去回應埋呢啲都唔知應該稱之為咩o既回應,佩服呀! 仲有呀,有人話你(路人丙)其實係我(gunner)自說自話「扮分身」唱雙簧架增加留言數目架咋,好心你(定係「我」呢)有時間就學下打麻雀,防止老人痴呆啦!



嘿!你又知本阿丙唔打牌?本人打遍"雞記"無敵手呀!不過,睇到高錕現狀,我以後都唔信打牌可以防止老人癡呆咯,得閒不如嚟呢度多跟d無聊人發0翕風好過!唔抵得咩?


[引用] | 作者 路人丙 | 1st Nov 2009 10:03 AM | [舉報垃圾留言]

[12] Re: Gunner
Gunner :

丙,你都幾得閒,人地又唔係話緊我,又唔係冷嘲熱諷,又唔係指桑罵槐,你竟有氣去回應埋呢啲都唔知應該稱之為咩o既回應,佩服呀! 仲有呀,有人話你(路人丙)其實係我(gunner)自說自話「扮分身」唱雙簧架增加留言數目架咋,好心你(定係「我」呢)有時間就學下打麻雀,防止老人痴呆啦!

...



擺到明就係話你啦﹐87。

文少
[引用] | 作者 文少 | 19th Nov 2009 09:41 AM | [舉報垃圾留言]

[13] Re: 黑人
黑人 :
特首講「玩舖勁」,佢完全keeps his promise
全香港人被佢玩得唔夠勁咩?


連人地個家 -- 菜園村成個鏟起, 米埇建地下鐵路, 一刀割開新西, 夠勁啩 ?


[引用] | 作者 Philip | 24th Dec 2009 13:59 PM | [舉報垃圾留言]

[14]

現在不同人了, 但感覺還要差

 

 

激光脫毛 激光脫毛 gentlelase


[引用] | 作者 anitayip | 29th Jan 2014 09:39 AM | [舉報垃圾留言]